logo mix

Rab Danas

Nezavisni internetski portal otoka Raba

Gif animacija za zapoljavanje 2000x240px

 

Ponedjeljak, 24 Listopad 2022 17:03

Rapski kantunić Josa Fafanđela: LIPO VRIME

Napisao/la Josip Fafanđel
Ocijeni sadržaj
(1 glas)
Rapski kantunić Josa Fafanđela: LIPO VRIME Foto: Josip Fafanđel

Jušto se pitan ako vridi more bit potrošit dvajsetak besed za ćakulu o vrimenu? Varamente, vrime se je priko nedilje malo na drugi mod obrnulo, ali govoru oni od prognoze da to neće puno durat i da će još bit onoga lipoga babljega leta. Ali valja imit napamet kakovo je vrime bilo va ovih pasanih par, a i više šeteman. A lipo brate, da bolje ne more bit? Eto, zato jušto vridi i o lipomu vrimenu potrošit par onih besed.

 A ni lipo, brate moj, lipotu ne vit i va životu je preskakat. Da ne rečen kuliko je ono lipo vrime hodilo na ruku i oniman ki su se kakovoga posla ćapivali. Da, i na moru i na kraju. Ako se samo držin onoga ča moj sused po celi dan čini, pari mi se da će ovo bit godina kada će ljudi va zemlju sve stavit, sve simenje, i prije kanate od godine. I luk i kapulu, i bob, a sve brate, jedino da je još malo rano za biži i kumpir.

 

Inšoma, a i sami ste mogli šervat da je po celi dan bilo teplo, sunce, ki put malo vetrića, ma više bavice nego vetrića, a va zadnje vrime ma ni bavice ni vetrića, nego samo mir Božji, kako se ono reče. Zato bi se po noći malo i rosa došuljala. A zvečera, prid kaladu od sunca, nebo bi se redovito pretvaralo va črljeno platno na komu bi se prikaževala najbolja slika ove naše zlatne bale na koj mi živemo i ka se zemlja zove.

 

Danas ljudi imaju muderni mobiteli, ali imaju i oko i dušu, pa su vreda tu lipotu i šervali, sve su slikivali i kako da su se takmičili ki će bolju sliku na fejsbuk prezentat. A slike, sve lipe, sve lipota do lipote, ma tuliko lipe da bi bilo vele muke ako bi tribalo zibrat onu najbolju. Pa, ala recite, ki toj lipoti more odolit! Dabome, i ja san sto puti sve to poslikal, a na kanati nisan mogal a da zeru i va pismu zamišan. Sunce na kaladi, nazval san tu pismicu, ali neću van je celu povidat, nego samo delić, da mi ne zamirite, boj da sebe priko mere falin. A taj del od pismice gre uvako: Sunce se doli kaliva/ Kolo njega na sve sorte kolori/ Zgor Cresa/ Nebo se preliva/ Va miljar črljenih fijori/ Oblaci se piturali/ Zlato se razlilo/ Črljeni su zasvitlili ferali/ A nebo/ I nebo se nagorilo...


Eto, tako van je to. A ni lipo, brate moj, lipotu ne vit i va životu je preskakat. Da ne rečen kuliko je ono lipo vrime hodilo na ruku i oniman ki su se kakovoga posla ćapivali. Da, i na moru i na kraju. Ako se samo držin onoga ča moj sused po celi dan čini, pari mi se da će ovo bit godina kada će ljudi va zemlju sve stavit, sve simenje, i prije kanate od godine. I luk i kapulu, i bob, a sve brate, jedino da je još malo rano za biži i kumpir. Ma ako ćemo pravo i ni rano, nego smo na ovomu našemu Rabu pomalo va strahu od bure, ka jušto već va jedanajstomu misecu zna zeru jače zapuhat. Pa bura donese i velu šaku soli, a unda ono mlado lišće najprvo zimlati, pa potle i va solini zgori. Ali govoru, da to jedino luku i kapuli ne škodi. Slažen se, zato san i rekal susedu da bi jedino onaj bob ča ga je posadil mogal pasat onu grubu bariškadu. Bura će ga sprlit. Neka sprli, govori un meni, ali ja san simenja za još jednu turu ostavil, pa ću ga nanovo posadit. A ča san mu na to mogal reć nego kako je to pametno učinil.

 

A lipo vrime, kako se ono reče, lipu je nogadu dalo i onomu otvorenomu poslu gradu na obali. I neka je, boj i unako su već obećali da će sve to bit zgotovljeno do začetka nove sezone. A kuliko je tudi posla i ča sve triba učint to je njihova briga. A tobože, da ćeju dignut obalu da više po jugu more ne pasiva priko i potopi sve do pol grada, pa učini grubu ruvinu. Bravo, neka tako i bude, ali valja in dat do znanja da nan se baš nebi jako pijažalo, ako z raskopanon obalon dočekamo novu sezonu.

 

Strah me je, dabome, boj ne pametin ča se je to, ne samo na Rabu, nego po celoj državi na vrime završevalo. Ala šu, jedino da ne uvridimo Kinezi ki su onaj lipi i veli Pelješki most jedini na vrime digli na noge. Da, i zato ni nikakovo čudo da više puti volimo reć ono, da kada se čovik opari, unda i na mrzlo puše.

 

Tići pivaju, a sovine buču...

Inšoma, valja reć ono ča je – lipi dani za sve su nan vridili. Ben, ma i lipe noći ni triba zaburavit. Ne pačan se ča se sve va lipiman noćiman more dogajat, boj na žalost, već san to pomalo i zaburavil. Zato ću van rađe povidat kako lipu noć volu i sove. Te vele tičine domislil san se isto pasanih dan, ali va oniman tihiman noćiman i veloj misečini. Ćara noć i misečina, to je pravi štajun kada se moru čut tice sovine kako pivaju po gušćiman. Varamente, naši stari su govorili da one ne pivaju nego da buču. A kada pivaju kolo kuće, oli i na vrh kuće, da unda i nesriću navišćuju. Ma imaju grube pivade, valja reć ča je, ali ja bi ih ovih pasanih noći, isto z velin gušton poslušal. Jedino, ako mi zapiva na vrh kuće unda je potiran, boj uz njezino bukanje ni ča zaspat va postilji.

 

Ali pametin ja na susestvu jednu babu Matiju ka ni volila da je sova buče kolo kuće, boj da je to tobože sinjal da će niki va kući brzo umrit.

 

A malo dalje na susestvu živil je još jedan ded ki je bil i malo stariji od nje. Pa kada bi sovina na vrh kuće zabukala, baba bi je navi mod potirala:

- Hodi vraže bubina ća od mene, meni još ni vrime za umrit. Hodi tamo kod suseda, un je par godišć stariji od mene. Uš vraže bubina, uš!

 

Joso Fafanđel - za Kantunić (24.10.2022..)

 

 

Pročitano 309 puta

 

 RAT1 600

seakayakcroatia

 

BANNER350 BarbaSIME1