Home Beseda po domaću Rapski kantunić Josa Fafanđela: DRONI, KAMERE I PRAĆE

Rapski kantunić Josa Fafanđela: DRONI, KAMERE I PRAĆE

0
Rapski kantunić Josa Fafanđela: DRONI, KAMERE I PRAĆE

Foto: Foto: Josip Fafanđel

 

Teško je to za virovat, ali govoru da sada lupeži pušćaju va zrak oni vražji muderni droni, ča letu na četire propelice, a oni ga ozdola peljaju kako da su nutri va njemu. I sve vidu, dabome.

Rab danas oglas

 

Ben, ma čitan ja tamo da su se sada i male lupežarije prehitile na muderan mod. I na Rabu, dabome. Teško je to za virovat, ali govoru da sada lupeži pušćaju va zrak oni vražji muderni droni, ča letu na četire propelice, a oni ga ozdola peljaju kako da su nutri va njemu. I sve vidu, dabome. I to je ono ča me čudi, boj da ti muderni lupeži, ti vražji droni, peljaju po Rabu zgor kuć, pa da nati mod najprvo špijaju ka je kuća otvorena, je koga doma, a i bože moj, ako se ča more i na dvoru ukrast.

 

Inšoma, za ne virovat, ali piše tamo da je toga bilo kod nas i ovoga pasanoga leta. I ala šu, ljudi su i o tomu učinli ćakulu, i dabome, sada najviše njih govori da dočim se toga vraga šerva zgor kuće, da ga triba vreda na puliciju prijavit, oli drito slat niko pismo va Zagreb. Dabome, drugi se na to smiju, boj dokli pulicija doteče, lupeška operacija je gotova, drona više ni. Zato je jedna ženska drito i kuražno napisala uvako: “E da san ja to znala, ja bi ga sama obalila!” A jedan drugi je priporučil, malo se sulacajuć, a više i ozbiljno, da dočim ga vidimo i čujemo kako zgor dvora brnči, da je najbolje zet va ruku zračnu pušku, pa fljas! i doli šnjin. Tako je!, nadodala se je jedna druga ženska nato i ozbiljno je priporučila kako je sada najbolje tornat nazad one nidanje diteske štreljice, praće i fijandre, pa udri svi po njiman. Da, da, svi va kup, va zračni napad – na droni.

 

A bit će brate grubo ako nas i dogodine budu napadali na isti, oli još i na gori mod. To pari da ni druge nego va svakoj kući počat zazbilja parićivat strategiju zračne obrane. Evo, a more bit da je najbolje poć va naše Dundovo. Da, neće bit druge nego poć va Dundovo i tamo zajat kamere, pa unda poć na špiju i slikivat ti vražji droni. Oli je more bit još bolje zadužit Dundovo da oni to sami činu. Ne sulacan se, nego san zazbilja pročital da su Grad Rab i Dundovo okolo namestili nadzorne kamere. Tobože na mestima kadi se smeće kupi. Nati mod da oćeju slikat onih ki smeće nepropisno dilu i stavljaju na kupi. Oštija, možda je na prvu malo i smišno, ali ne, ne sulacaju se oni, nego su jako ozbiljni. A ča da van rečen, evo, ako ste slikani da ste smeće krivo stavili moreju van doma poslat globu od 500 do 2.000 kun. A obrnticima i oniman ča imaju poduzeća njih čekaju još i puno veće globe.

 

Ja san moje kante za smeće stavil doma pod jednu črniku, pa san ovih dan sve obašal okolo, a po skalamin san se digal i gori na stablo tobože da ću nać, ako su more bit i meni namestili onu špijunsku kameru. Ali ča se je dogodilo? Šerval me je sused, pa me pita da koga vraga se to prtin po črniki. A ja mu govorin da išćen kameru i povidan mu ča je na stvari. Dabome, un mi ni viroval, nego mi je rekal da san šal na muhu i latil se je od srca smijat. Smij se ti smij, govorin ja njemu, ma nemoj se čudit ako jednoga dana doma dobiješ sliku i globu od 500 kun!

 

Inšoma, va ovo muderno vrime na svaki modi nas napadaju. Lupeži z droniman, a Dundovo s kameramin i globamin. Ma imila je ona ženska diboto pravo, triba učint fijandru, oli praću pa malo pošpijat i droni i kamere. Pa šaku stenčic va tašku, nategnut laštik i i pomalo i jedno i drugo zboćivat. Ali z jutra ranije, boj sada kada su reloj tornali uru nazad, sada za tren i škuro ariva. A jutro se ranije razdani. Prvije je dan bil jednu uru duglji, pa se je potle ubeda još ča moglo učint vani kolo kuće. A navi mod te samo tiraju da se ranije digneš. Ala šu, oni ki gredu na posal su nato i naučili, ali mi penzijoneri (makar ne svi) volimo jutro malo postilju mučit i jednu uru više. A sada vidiš vani svitlo, pa se moraš dignut. A eto, ni odmarat nan ne daju va ovo novo vrime. Još samo fali da nas oni i po dvoriman špijaju i slikaju, kada se dižemo i kuliko posla učinimo. Tobože da bez našega penzijonerskoga laura ne bi država propala. Oštija, ma nać ću ja malo vrimena, već kuliko ovih dan, pa ću i ja onu starinsku praću uplest. A stenčic kolo kuće ima kuliko oćeš, pa ni municije ne će falit.

 

Boj oćo ve, od svakoga vraga se danas triba znat obranit.

 

Joso Fafanđel – za Kantunić (7.11.2022..)

 

 

KOMENTIRAJ ČLANAK

Molimo, unesite Vaš komentar!
Molimo, ovdje unesite Vaše ime