logo mix

Rab Danas

Nezavisni internetski portal otoka Raba

×

Upozorenje

JUser: :_load: Nije moguće učitavanje korisnika sa ID: 745
Subota, 14 Svibanj 2016 20:00

Apoksiomen i naš lule

Napisao/la
Ocijeni sadržaj
(2 glasa/-ova)
Apoksiomen i naš lule Fotografija lula i lulice: Ivo Šubić

E da, sada lipo moremo poć Lošinj i vit onoga veloga Apoksiomena. I ča ćeš vraže, a ki će tamo prvi poć nego naši vridni penzijoneri. Skupilo se njih pun brod i još su sobon zeli svoji i naši prijatelji od Kočevlja. Potle san puno od njih pital kako in je bilo i kuliko in se je pijažal taj novi muzej i njigov Apoksiomen? Oni ki su to vidili nisu se mogli nafalit. Govorin oni ki su to vidili zato, boj da je bilo i onih ki za to nisu njanci malo marili, nego da su šli gledat hoteli.

A bil je tamo i moj sused ki je šal va muzej, pa ni un ni imil riči naki mod sve to meni nafalit.

- Znaš ča, govori un meni, jedina primjedba ku san tamo čul bila je od jedne ženske ka mi je rekla uvako: Ma ju meni, ma kako to more bit da nako veli čovik ima unako maloga pinčića, da prostite! I tobože, da bi ona otila, da mu je onaj ki ga je činil nabandal sprida malo veću polugu. A ja san je lipo rekal, govori mi jopet sused, da un ima maloga, ali da taj mali po potribi more i narast.

A ja san se nato diboto još i narugal, pa govorin da naki mod i more bit veli kada je dvi hiljade godin mori banjal. A va mrzlomu moru se ona muška stvar jako navelo daje vasebe. I bude mali ala želuda.

Kad potle par dan nabasan ja na jedan naš rapski spomenik. Na lula i lulicu i to ne na jednoga, nego na dva para. Jedni visu na štantu va Drazi, a drugi Mundanijah jušto malo prije škole. To pari da je bilo i pirovanja. I to ne jedno nego dva. Oštija, a to je dobro. Neka se mladi ljudi ženu, neka se paru i činu dicu za racu. I unako se ovi naši na vlasti duron jadaju da nas je va državi sve manje i da će jednoga dana Hrvati zasvin nestat. Zato se ja vajk veselin dočim šervan lula i lulicu gori na vrh štanta. Najprvo to je naša lipa užanca ke se mladi još vaj držu, a drugo, to mi je nikakor ma šćeto lipo i za vit.

I ne more se nikakor reć da je naš lule kako onaj lošinjski Apoksiomen. Svaka njemu čast, ma ako ćemo hitit oko na ono mednoge, e naši su luli po tomu jako napridovali. Našiman vele bandere mednoge jarbulaju. A na onomu lulu va Drazi nikoga vraga su i napisali, tobože da valja i dicu čint. Oštija, mislin se ja, a koga vraga to triba i napisat, kada ona duga lulova laganela mednoge sve govori. Ona jedino taj posal navelo i navišćuje!

Pročitano 2690 puta

Ova e-mail adresa je zaštićena od spambota. Potrebno je omogućiti JavaScript da je vidite.

seakayakcroatia