Home Beseda po domaću Kralj je gol

Kralj je gol

0
Kralj je gol

Foto: RabDanas

Ali ja san niš drugo otil reć. Čitan gori onu tabelu na Bobotinamin pa san šerval kako je već ravno 80 godin pasalo od kad su se va našoj Kandalori, jušto tamo na Frkanju, goli golcati kupali nidanji pretendant za kralja Engleske, Edvard VIII i njigova ljubav, gospođa Simpson. Bilo je to jušto po leti 1936. godine. A to triba i zapametit, boj ne more se na Rabu svaki dan vit gologa kralja.

I tako je Kandalora i dan-danas ostala Najlon plaža, kadi se i sada kupaju jedino oni ki ne volu budandice na sebi.

Rab danas oglas

E, a mi domaći?

Mi domaći se i dan-danas bojimo kalat budandice, kako muški tako i ženske, dabome. Evo, povidali su mi jednu štoriju, kako su va ono staro vrime, muž i žena (niki naši Palićani), kako su se jadali svomu likaru da ih muči reuma, pa neka ih pošalje malo va toplice.

A likar da in govori: “Ljudi moji, pa koga će van vraga toplice kada vi imate toplice udi na Rabu. Potle sezone, kada gosti idu ća, lipo se hodite goli kupat doli na Frkanj. Sunce, teplo more i vrući mel, a ča ćete bolje toplice od toga. I još sve to imate za niš.”

I učinli su oni tako.

Frane je prvi kalal budande i šal more, ali Marija još čuči gola zada grma.

– “Ala Mare”, zove un nju, “pasaj pomalo more, koga vraga čekaš?” I digla se je ona, gre pomalo gola kroz plićak, ali z obe dvi ruke drži pokrijeno lice.

– “Marija, a koga vraga pokirvaš lice”, trubi un nanju.

– “Ne moren”, govori mu ona, “sran me je da će me ki vit golu!”

A Frane da će nato njoj: “E, šorda moja šorda, pa ako te je sran unda z rukamin ne pokrivaj lice, nego pokrij tu nesriću mednoge!”

KOMENTIRAJ ČLANAK

Molimo, unesite Vaš komentar!
Molimo, ovdje unesite Vaše ime