Gotovo je, korona i njezine užance šli su va naši životi i nećemo se toga tako lako liberat. Gre nan to pomalo va nauk. Tako san niki dan kuntral jednoga, gre po cesti i nosi masku. A ča će reć da nosiš tu trubicu i po vanu?, pitan ga ja. A un je unda masku z rukon naglo zgulil, pa govori: A vidiš ti ovo, zaburvil san vraga znet ća od nosa! Da, ako ovo zlo bude duralo i sviman namin će se pomalo to začat dogajat.
Mala Gospa je za Loparani dupli blavdan; i dan od Općine i blavdan od Male Gospe. Ben, ma odavna već, i ja nikakor isto iman nauk malo se tamo zaletit. Svi su prije toga govorili da će ove godine poradi korone i Lopari bit puno manje dogajanja. I je, ni bilo ni pečenoga vola, a ni onoga veloga šatora tamo na sazmorcu, pa unda ni tanci, dabome. Inšoma, bile su mise - i jutro i popodne, a i onaj veli sajam na bancima ni preskočen. Ma i to se je govorilo, da će ove godine bit mali sajam, tobože, puno manji. Ali ni bilo tako, nego me je znenadilo kuliko je bil veli, ma diboto isti kako i lani.
Da, da, to su ta jutra ka naviščuju kanatu od osmoga miseca (od agušta) bi rekli naši stari. I ne samo od agušta nego i od glavnoga leta, pa unda ovo ude kod nas i kanatu od glavne sezone od gosti.
Ni puno pasalo da su bili izbori va državi. A spominjen to zato boj se je govorilo da smo mi muški jopet bolje pasali nego ženske. Tobože, da ih je malo zibrano va ove nove vlasti. A mene je to unda jušto malo zazašćalo, pa san se više puti pital, tobože, da kako ćeju ženske pasat na izboriman kod nas na Rabu.
Inšoma, jopet nan je lipo vrime arivalo, a i naša Fjera je unako boležljiva i šepava nikakor pasala. Ben, ma leto još dura, gosti arivaju kuliko je to moguće, s trubicamin se borimo kuntra virusa, moremo se kupat i tanko obučevat, moremo spat i va kući i po vanu, moremo mrzlu pivu popit, i sve takove lipe stvari, da i ono drugo ne nabrajan.
Inšoma, ča se korone tiče vidite i sami ča se dogaja. Svi strahuju da i neće puno kalivat, nego da bi mogla bit sve jača i jača. I sada su nan sviman nabandali one vražje trubice, kroz ke varamente moremo dihat, ali mi se svako to malo orćali zamagljuju, pa ih duron taren, a to pari da ni oni nećeju dugo durat. I tako zaman govoru, da trubica ni skupa. Oštija, trubica ni ma su zato orćali ala vraga skupi.
Inšoma, kako je da je, puno je vrimena proteklo va strahu ono kada smo s trubicamin na ustiman tekli po butigamin i svajdi naokolo. I evo ga na, pasali smo već i polovicu od šejstoga miseca, a ni daleko ni ovgodišnji blavdan od Petrove. Pa se pitan - kadi smo i ča smo? Ma intanto, kako da pomalo sve gre va svoju regulu.
Ma kadi smo i ča smo? Vidimo se, čujemo, oli kumpanjamo? A vrag će ga i znat kadi smo i ča smo, kad se slabo vidimo, a još manje kumpanjamo.
Čovik kako da vajk mora bit va nikomu strahu. Ovoga puta je to onaj nesrićni korona virus. Ma jopet, jedni govoru kako je sve to samo malo priko mere napuhano i da je taj vražji virus niš drugo nego kako i svaki drugi. Recimo kako i gripa. I jušto se moramo i pitat da ča je zoton vražjon gripon? Niki o njoj sada ne govori ma njanci jedne jedine besede. Kako da je ni, kako da je zasvin nestala i kako da se je i ona prestrašila ovoga novoga virusa. Da i nju ne zatare, pa do godine ni nje više ne bude. A ki zna, sve je moguće.
Blavdani su pasali, izbori su pasali i ja razumin da smo se zotin malo i spuhali i zimorili. To pari da je arivalo vrime kada bi se sada valjalo malo i latit kakovoga posla. Oli ćemo još i maškari čekat pa ćemo unda! A neka, i to je lipo. Jedino da va svemu i malo miru ne prepasamo.
