Inšoma, ča se korone tiče vidite i sami ča se dogaja. Svi strahuju da i neće puno kalivat, nego da bi mogla bit sve jača i jača. I sada su nan sviman nabandali one vražje trubice, kroz ke varamente moremo dihat, ali mi se svako to malo orćali zamagljuju, pa ih duron taren, a to pari da ni oni nećeju dugo durat. I tako zaman govoru, da trubica ni skupa. Oštija, trubica ni ma su zato orćali ala vraga skupi.
Inšoma, kako je da je, puno je vrimena proteklo va strahu ono kada smo s trubicamin na ustiman tekli po butigamin i svajdi naokolo. I evo ga na, pasali smo već i polovicu od šejstoga miseca, a ni daleko ni ovgodišnji blavdan od Petrove. Pa se pitan - kadi smo i ča smo? Ma intanto, kako da pomalo sve gre va svoju regulu.
