Slušan ovih dan na radiju pismu va koj na kanati pivaju: ...e da mi ljubav daju svaki dan... Lipo je to za čut, ali da se jušto nati mod i dogaja, e sve me je jako strah. A ki će ti vrag danas davat ljubav i to još svaki dan. Ni doma, a kamo li okolo. Ala šu, kod mladih se more bit još ča to od toga i dogaja, ali kod nas malo starijih, bojin se sve manje i manje. Zato mi ki smo već nakupili lipo brime tih vražjih godišć, mi isto sve više hlipimo da ljubavi ča više najdemo baren zvan kuće.
Cela ova šetemana pasiva va sinjalu od Vazma. A začalo se još i prije, sve od Josipove, priko Maslinarice, pa do vazmene nedilje i vazmenoga ponediljka. Istešo, sve je to ove godine arivaloi malo ranije ča se more i šervat, boj ni zelenilo okolo još ni va onoj pravoj forci. E, ali kokoše, nebojse, one znaju svoj posal. Makar je Vazan arival ranije kokoše su navrime sedile na ložu i nesle jaja, kako da i one pazu va kalendar i šervaju da je Vazan blizu, pa valja na prešu i pune kuneštre jaj nanest. A ča bi i bil Vazan bez onih lipih domaćih jaj! Jaja za piturat, jaja za blagoslovit, jaja kuhana i jaja va onoj starinskoj golubici.
